Sa bawat chalk na kanilang hinahawakan, mga pangarap ang nabibigyang daan. Sanay sila sa makukulit na bata, pero dito sa "It's Showtime," ang mga bisitang guro ang nakipagkulitan sa ‘Laro Laro Pick’ game arena.
Kinilala ng hosts si Teacher Jo, na 27 years na ang karera sa eskwelahan. Kung minsan siya'y kinatatakutan, pero promise, hindi siya masungit. Ang totoo n'yan, pag-amin ni ma'am, silang mga guro pa ang 'di maiwasang matakot sa mga estudyante dahil sa pangahon ngayon na ibang-iba na ang paraan ng pagdidisiplina sa paaralan.
Siya pa nga ang minsang naipatawag sa principal's office nang diumano'y pagalitan niya ang estudyanteng madalas lumiban sa klase. May pagkakataon din na pinagbantaan siya ng isang bata—subukan daw niyang magalit at sa barangay sila magkikita. "Ngayon talagang mas matatakot ang teacher sa bata," pabirong pahayag ni teacher.
Sa classroom, si Ma’am at Sir ang unang gumagabay. Sila ang nagtuturo kung paano mangarap at lumaban sa buhay. Mula umaga hanggang gabi, lesson plan pa rin ang kanilang hawak, pero ang sweldo, palaging salat. Kaya ang panawagan ni Ma'am Jo at ng mga kasamahang guro, "Baka naman!" Sahod ng mga teachers ay dagdagan!
Kung akala n'yo ang 'London' ay lugar ng sosyal at malamig, para sa mga teachers, ito ang takbuhan nila kapag kinakapos sa panggastos—'London,' as in, 'loan-dito' at 'loan-doon.' Dinadaan na lang nila sa biro ang problema sa sweldo, pero sana seryosohin naman ito ng gobyerno.
Seryoso with fun on the side naman ang pagsagot nila sa mga tanong sa 'It's Giving' round. Pero pagdating sa aktingan portion sa 'You Gotta Lyric' kung saan naki-join pa sa kulitan-acting si Kapamilya actor Anthony Jennings, naku, na-zero ang mga guro. Kaya bumunot ng player na aabante sa final exam.
Si Teacher JR ang lucky player na nabunot para maglaro sa jackpot round. ‘Luck’ ba niya ay pasado, o babagsak siya sa isang libong papremyo?
Good vibes at pag-asa ang hatid ng “It’s Showtime,” Lunes hanggang Sabado, 12 NN, sa ABS-CBN sa ALLTV2, GMA 7, A2Z, Kapamilya Online Live (KOL) at iWant.