Happy Thanksgiving Day, madlang people! Isa ka sa man sa nagce-celebrate nito o hindi, we can all agree na marami tayong dapat ipagpasalamat sa taong ito. Isa na rito ang happiness at good vibes na dulot ng panonood ng It’s Showtime six days a week!
At hindi exception ang November 28 episode, kung saan hindi lang birthday ni “Kuys” Ion Perez at iba pang member ng Showtime fam ang ipinagdiwang natin, kundi pati na rin ang newly released song ni Reina Hispanoamericana 2025 Dia Mate na pinamagatang “This Christmas (Ho Ho Ho)” na pinerform niya live kasama ang kanyang ka-collab na si Rufa Mae Quinto!
Dahil may “Ho Ho Ho” sa title ng kanilang Christmas collab, pinaunlakan nila ang request ng hosts na mag-sample ng signature na tawa ni Santa Claus. Habang as a sweet and sultry girl ang atake ni Dia, si Rufa Mae naman ay pinarinig ang version niya na inspired ng kanyang trademark tagline na “Go Go Go!”
Hindi rin nakalimutang pasalamatan ng “Comedy Bombshell” si Dia na producer ng nasabing kanta sa pagpili sa kanya para maging ka-collab. Ayon sa talented beauty queen, napili niyang i-feature si Rufa Mae dahil nakita niyang perfect fit or match sa personality nito ang kanta.
Bukod kay Ion, hindi rin na-miss ng hosts na batiin ang ibang birthday celebrators, kabilang na ang Showtime Baby Girls members na si Cole.
Exactly 27 days before Christmas, 20 LET (Licensure Exam for Teachers) examinees ang nabigyan ng pagkakataong mabago ang kanilang buhay sa “Laro Laro Pick” segment. Pero bago magsimula ang game, nakipagkuwentuhan muna ang hosts na sina Vhong Navarro at Jhong Hilario sa ilan sa aspiring teachers.
Una na rito ang future Physical Education teacher na si Amskie, na isa sa mga nag-take ng LET noong nakaraang Setyembre at nagma-manifest na makakatanggap ng magandang resulta sa darating na Disyembre. Pinayuhan din niya ang mga susunod na kukuha ng nasabing exam na magsimula nang magbasa-basa tungkol sa kasaysayan ng Pilipinas. Kapag nanalo siya ng P300,000, binabalak niyang gamitin ito sa pag-pursue ng masteral degree.
Isa rin sa mga nag-take ng LET noong Setyembre ay si Angie, na ibinahagi kung paano siya nahirapan sa “Professional Education” part ng exam, kung saan agree ang kapwa examinees niya na sina Nour at Yna. Ayon sa kanya, pang-apat na siya sa pamilya nila na tumahak sa landas ng pagtuturo at ang nag-inspire sa kanya ay ang pangalawa sa panganay niyang mga kapatid, na nagsilbing punongguro sa loob ng 15 taon sa parehong eskuwelahan na pinagtratrabahuhan niya ngayon. Nag-sample din si Angie ng paraan niya ng pagtuturo kina Vhong at Jhong, pati na rin kay Ryan Bang.
Sunod nilang ininterview si Cherry, na four times nang kumukuha ng LET. Nang tanungin kung bakit, ibinahagi niya na nahirapan siyang pumasa dahil hindi niya kinayang pagsamahin ang pagtratrabaho at pagse-self-review. Sa kabila ng paulit-ulit na pagkabigo, patuloy pa rin siyang umaasa na makakapasa dahil sa kanyang mga magulang na hangad ding maisakatuparan ang pangarap niyang maging guro. Ibinahagi niya rin ang kahalagahan ng pagpasa sa LET at kung paano siya na-inspire ng kanyang mga guro noong high school na magturo rin.
Matapos ang elimination round, 12 players ang natira at nagpatuloy sa “It’s Giving Round”, kung saan tinanong sila tungkol sa iba’t ibang bayan at siyudad sa Quezon Province. Anim ang nag-proceed sa “You Gotta Lyric Round”, kung saan kailangan nilang punan ang missing lyrics sa popular Christmas song na “Jingle Bells” na binigyang-buhay ng Six Part Invention Band at ni Kapuso singer na si Garett Bolden.
Apat na players ang naiwan sa “PILImination Round”, kung saan ang aspiring teacher na si Mylene ang nagwagi at nabigyan ng pagkakataon na maglaro sa jackpot round.
Absent man siya sa first two bodies ng November 28 episode ng “It’s Showtime”, labis namang ikinatuwa ng madlang people ang surprise appearance ni “Meme” Vice Ganda sa jackpot round ng “Laro Laro Pick”, kung saan ang aspiring teacher na si Mylene mula sa Pasig City ang nagkaroon ng pagkakataon na ilaban ang jackpot prize na P300,000.
Sa pakikipagkuwentuhan sa kanya ni Vice, ibinahagi ni Mylene na ang original plan talaga niya ay maging isang nurse. Ngunit dahil sa kakulangan sa pang-tuition at di iyon aligned sa naging strand niya noong senior high school, minarapat niya na mag-take ng Education, na isa sa programs na ino-offer sa kolehiyong malapit sa bahay nila. Hindi man pagiging guro ang first choice niya, na-realize niya eventually na ito na ang karerang gusto niyang tahakin.
Masaya man ang naging usapan nila tungkol sa kanyang lovelife, hindi naman napigilan ni Mylene na maging emosyonal nang usisain kung saan niya gagamitin ang jackpot prize sakaling mapanalunan niya ito. Ayon sa kanya, ilalaan niya ito sa muling pagpapagamot ng karamdaman sa tenga ng kanyang ama, na labis na umanong nakakaapekto sa kanyang pandinig at utak. Bagaman nais niya sanang makuha ang P300,000 dahil malaki ang maitutulong nito sa kanilang pamilya, nagpasya siyang lumipat at tanggapin na lamang ang P50,000 na offer nina Vhong at Jhong.
Napatunayan ni Mylene sa bandang huli na tama ang naging desisyon niya matapos na bigong masagot ang jackpot question tungkol sa kung anong salita ng katumbas ng letter “Y” sa NATO (North Atlantic Treaty Organization) phonetic alphabet. Ang tamang sagot ay “Yankee”.
Sa pagpapatuloy ng tunggalian sa “Tawag ng Tanghalan Duets Season 2”, unang sumalang ang “Vocalistars”, o ang tambalan nina Sendhara Trillanes at Romeo Ramos, na nagpakitang-gilas sa kanilang rendisyon ng “Beep Beep” ng legendary OPM band na “Juan Dela Cruz Band”.
Sa pakikipagkuwentuhan ng hosts kina Sendhara at Romeo, hindi lamang nila nalaman ang naging inspirasyon sa kakaibang pangalan ni Sendhara at ang mga bansa kung saan pangarap nila na magtanghal. Nang mabanggit ni Romeo ang salitang “total”, nagbalik-tanaw si Vice Ganda sa panahon kung kailan rumarampa sila ng mga kaibigan niya sa isang gasolinahan sa Valenzuela City na gano’n ang pangalan.
Bagaman napahanga nila ang mga hurado na sina JM Yusores, Bituin Escalante, at Louie Ocampo sa kanilang perfomance, tila nakulangan sila sa harmony at variety na ipinamalas nina Romeo at Sendhara.
Sumunod namang sumalang sa tanghalan ang tandem nina Miah Tiangco at Eunice Encarnada na tinawag na “Dugong Bughaw”, na pinamangha ang lahat sa kanilang bersyon ng “Isang Linggong Pag-ibig" ni Imelda Papin.
Sa panayam sa kanila ng hosts, ibinahagi ng dalawa ang kanilang mga dahilan at motibasyon sa paulit-ulit na pagsali sa “Tawag ng Tanghalan” sa kabila ng pagkatalo nila sa mga nakalipas na edition. Nang aminin nina Miah at Eunice kung gaano ka-challenging ang magkaroon ng ka-duet, sinabihan ni Vice Ganda sina Kim Chiu at Jackie Gonzaga na huwag nang ituloy pa ang plano nilang sumali sa “TNT Duets”.
Ngunit hindi naman sila napigilan sa pagkanta ng version nila ng “Isang Linggong Pag-ibig", kung saan napakomento ang Unkabogable Star na iyon ang tipo ng mga tinig na magandang ihinto sa simula palang at hindi kagulat-gulat kung bakit iniwan ng kanilang mga ex! Kaya naman ang dalawa, napa-violent reaction sa sinambit ni Meme!
Sa bandang huli, mas nanaig sa pandinig ng mga huradomg sina JM Yusores, Bituin Escalante, at Louie Ocampo ang duet nina Miah at Eunice na nakakuha ng 96%, samantalang 91.3% naman ang nakamit ng duo nina Sendhara Trillanes at Romeo Ramos.